Покліч душы і сэрца
Канікулы-прыдатная пара для актыўнага адпачынку, пазнання навакольнага свету, адкрыцця цікавых старонак з мінулага роднага краю, сваёй нацыянальнай спадчыны, слаўнага гераічнага летапісу малой радзімы.
Няўмольна бяжыць час. Сплываюць у нябыт гады, дзесяцігоддзі, а веліч спраў нашых продкаў не цьмее, а становіцца ўсё больш блізкай нам, дарагой.
Менавіта такое духоўнае імкненне і кіравала намі, вучнямі 5 і 8 “Б” класаў, падчас наведвання музея “Баявой Славы” гімназіі № 1 г. Ваўкавыска.
У экспазіцыях музея прадстаўлены матэрыялы перыяду Вялікай Айчыннай вайны на Ваўкавышчыне, пачынаючы з моманту акупацыі нямецка-фашысцкімі захопнікамі і да вызвалення роднай зямлі.
Багаты экспазіцыйны матэрыял знаёміць са слаўным мінулым землякоў, з веліччу іх гераічных спраў, а таксама з бессмяротным подзвігам салдат-вызваліцеляў ваўкавыскай зямлі.
Асабліва вялікую цікавасць выклікалі ўнікальныя экспанаты, прадстаўленыя ў экспазіцыях музея (каскі савецкага, нямецкага салдата, асобістыя рэчы з ваеннай амуніцыі як савецкага, так і салдата варожай арміі, пашпарты-аўсвайсы, грошы, якія дзейнічалі на акупаванай тэрыторыі, выявы-постаці змагара-партызана, воіна-вызваліцеля і інш.).
Гэты каштоўны матэрыял далучае нас да велічных спраў барацьбітоў, падвялічвае наш нацыянальны гонар і чалавечую годнасць.
Таксама не засталіся раўнадушнымі ад наведвання пакоя Памяці ў гонар выдатнага ваўкавычаніна, акцёра расійскага тэатра і кіно Аляксандра Дзядзюшкі, які на самым высокім узроўні з гордасцю зазначаў, што яго малая радзіма - гэта ваўкавыская зямля.
Ведаць слаўнае мінулае, шанаваць традыцыі, захоўваць нацыянальную спадчыну павінна стаць поклічам сэрца, духоўнай патрэбай кожнага з нас.
Барысевіч Алена, вучаніца 8 “Б” класа
